யோகி பாபு, லட்சுமி மேனன் நடித்துள்ள ‘மலை’: செப்டம்பரில் திரைக்கு வருகிறது!

‘புளூ ஸ்டார்’ வெற்றியைத் தொடர்ந்து லெமன் லீப் கிரியேஷன்ஸ் சார்பில் தயாரிப்பாளர் ஆர்.கணேஷ்மூர்த்தி, சவுந்தர்யா கணேஷ்மூர்த்தி தயாரித்திருக்கும் இரண்டாவது திரைப்படம்’ மலை’. 

யோகி பாபு,  லட்சுமி மேனன், காளி வெங்கட் மற்றும் அறிமுக குழந்தை நட்சத்திரம் சதுர்த்திகா கணேஷ்மூர்த்தி நடித்திருக்கும் இப்படம் செப்டம்பரில் வெளியாகிறது. அறிமுக இயக்குநர் IP முருகேஷ் இயக்கியிருக்கிறார்.

மனித வாழ்வானது இயற்கையோடு இணைந்தது. மனிதர்களைப் போல விலங்குகளும், தாவரங்களும், மலைகளும், ஆறுகளும், நீர் நிலைகளும்  இந்த பூமியில் அதிமுக்கியமானவையாக இருக்கின்றன. அத்தகைய இயற்கையை, அதீத மனித ஆசையால் மனிதர்கள் மெல்ல மெல்ல தங்கள்  சுயநலத்திற்காக அழித்து வந்துள்ளார்கள்.

மனிதன் முதலில் தன் சுயநலத்துக்காக சுரண்ட ஆரம்பித்தது சக மனிதனைத் தான். அப்படி இரக்கமில்லாமல் சுரண்ட ஆரம்பிக்கும் மனிதன், மெல்ல மெல்ல இயற்கை வளங்களைச் சுரண்ட ஆரம்பிக்கிறான். அதிகாரம், அரசியல், மதம், சாதி, இனம் போன்றவற்றிற்குப் பின்னால் நின்றுகொண்டு, சக மனிதர்கள் மீது அன்பை மறந்து, எதிர்கால சந்ததியினரின் வாழ்வு குறித்து கவலைப்படாமல், பேராசையால் இயற்கையை மொத்தமாகச் சுரண்டி, இன்று அழிவின் விளிம்பில் கொண்டுவந்து நிறுத்தியிருக்கிறார்கள்.

தமிழக மலைக்கிராமம் ஒன்றில் நடக்கும் இந்த ‘மலை’ திரைப்படக்கதை, மனிதனின் சுயநல கோரப்பசிக்கு இயற்கையின் பதில் என்ன என்பதைப் பற்றிய ஒரு படைப்பாக வந்திருக்கிறது.

யோகி பாபு லட்சுமி மேனன், காளி வெங்கட் முதன்மை கதாபாத்திரங்களை ஏற்று நடித்திருக்கிறார்கள்.

தேனி ஈஸ்வர் ஒளிப்பதிவு செய்திருக்கிறார்.

இமான் இசையமைத்திருக்கிறார். செப்டம்பர் மாதம் வெளியாகும் இத்திரைப்படத்தின்  பாடல்கள் இன்னும் சில தினங்களில் வெளியாக இருக்கிறது.