எப்படி இருக்கிறது விஜய்யின் ‘தி கோட்’ திரைப்படத்தின் டிரைலர்?

ஏஜிஎஸ் எண்டர்டெயின்மென்ட் நிறுவனம் சார்பில் கல்பாத்தி எஸ்.அகோரம், கல்பாத்தி எஸ்.கணேஷ்,  கல்பாத்தி எஸ்.சுரேஷ் ஆகியோரின் தயாரிப்பில், வெங்கட் பிரபு இயக்கத்தில் உருவாகி இருக்கும் திரைப்படம் ‘தி கிரேட்டஸ்ட் ஆஃப் ஆல் டைம்’ (‘தி கோட்’).

இந்த திரைப்படத்தில் விஜய் இரு வேடங்களில் நடித்துள்ளார். அவருடன் பிரசாந்த், பிரபுதேவா, மோகன், ஜெயராம், அஜ்மல் அமீர், சினேகா, லைலா, மீனாட்சி சவுத்ரி, யோகி பாபு , வைபவ், பிரேம்ஜி அமரன், யுகேந்திரன், பார்வதி நாயர், விடிவி கணேஷ், அரவிந்த் ஆகாஷ், அஜய் ராஜ், கஞ்சா கருப்பு உள்ளிட்ட பலர் நடித்திருக்கிறார்கள்.

இப்படத்தின் கிரியேட்டிவ் தயாரிப்பாளர் அர்ச்சனா கல்பாத்தி மற்றும் அசோசியேட் கிரியேட்டிவ் தயாரிப்பாளர் ஐஸ்வர்யா கல்பாத்தி ஆவர்.

சித்தார்த்தா நுனி ஒளிப்பதிவு செய்திருக்கும் இந்த திரைப்படத்திற்கு யுவன் ஷங்கர் ராஜா இசையமைத்திருக்கிறார்.

ஆக்ஷன் எண்டர்டெயினராக தயாராகி, செப்டம்பர் மாதம் ஐந்தாம் தேதியன்று உலகம் முழுவதும் திரையரங்குகளில் வெளியாகவிருக்கும் ‘தி கோட்’ திரைப்படத்தின் முன்னோட்டம் இன்று (17-08-2024) மாலை வெளியிடப்பட்டது.

எப்படி இருக்கிறது டிரைலர்?

படத்தில் விஜய் கதாபாத்திரத்துக்கு காந்தி என பெயரிடப்பட்டுள்ளது. தொடக்கத்திலேயே அவர் யார் என்பதை பில்டப்புடன் சொல்கிறார் பிரசாந்த். தொடர்ந்து விஜய் தொடர்பான சாகச காட்சிகள், ஆக்‌ஷன் காட்சிகள் வந்து செல்கின்றன.

மொத்த ட்ரெய்லரின் நீளம் 2.51 நிமிடங்கள் என்றால் அதில் 2 நிமிடங்கள் சண்டைக் காட்சிகள் வந்து செல்கின்றன. அந்த அளவுக்கு அதீத ஆக்‌ஷனைக் கொண்ட படமாக இருக்கும் எனத் தெரிகிறது.

‘பிகில்’ படத்தில் விஜய் ”அப்பா…” என கத்துவது போல இந்தப் படத்திலும் அதே டோனில் கத்துகிறார். அப்பா – மகன், ஆக்‌ஷன், காதல், நண்பர்கள், புதிய மிஷன், ”சென்னையில் குண்டு வெடிக்கப் போகுது”, “மருதமலை மாமணியே முருகையா…” பாடலைப் பாடுவது போன்றவை விஜய்யின் முந்தைய படங்களில் பார்த்துப் பழகியவை தான். இவற்றையும் தாண்டி, வெங்கட் பிரபுவிடமிருந்து புதுமையை விரும்பும் ரசிகர்களுக்கு படத்தில் சர்ப்ரைஸ் இருந்தால் நல்லது.

படத்தில் மோகன் வில்லன் கதாபாத்திரத்தில் நடித்திருப்பதாக தெரிகிறது. “காந்தி வேஷம் போட்டு பாத்திருப்ப. முதல் தடவ காந்தியே வேஷம் போட்டு பாக்றேன்” என அவர் பேசும் வசனம் வந்து செல்கிறது. வழக்கமாக ரசிக்க வைக்கும் விஜய்யின் குறும்புத்தனங்கள் அவரது ரசிகர்களுக்கு விருந்தாக அமையும் எனத் தெரிகிறது. “இனிமே சத்தியமா குடிக்கவே கூடாது” என்ற ‘மங்காத்தா’ பட அஜித் வசனத்தை பேசுவது கவனிக்க வைக்கிறது.