எப்படி இருக்கிறது ’விடுதலை 2’ திரைப்படத்தின் “தினம் தினமும் உன் நெனப்பு” பாடல்?

இயக்குநர் வெற்றிமாறன் இயக்கத்தில், சூரி, விஜய் சேதுபதி நடிப்பில் உருவாகி மிரட்டலான படமாக வெளி வந்தது ’விடுதலை 1’. இப்படத்தில் அதிகம் பேசப்பட்டது சூரியின் நடிப்பும், இளையராஜாவின் இசையும் தான். சூரியின் நடிப்பு வேற லெவலில் இருந்தது  ஒரு பக்கம் என்றால், தனது அற்புதமான மெலடியால் அத்தனை பேரையும் கட்டிப் போட்டு மயங்க வைத்திருந்தார் இளையராஜா.

இந்த நிலையில் இப்போது ’விடுதலை 2’ படத்தின் ஒரு சிங்கிள் வெளியாகியுள்ளது. இளையராஜா, அனன்யா பட் ஆகியோரின் குரலில் வெளியாகியுள்ள இந்த “தினம் தினமும் உன் நெனப்பு” பாடல், ‘விடுதலை 1’ படத்தின்  ”வழி நெடுக காட்டுமல்லி” பாடல் சாயலில் இருக்கிறது. ஆனாலும் அப்படியே வேறு விதமான உலகத்துக்குள் நம்மைக் கூட்டிச் செல்கிறது. மனம் முழுக்க இசையாலும், உணர்வுகளாலும் நம்மை சுண்டி இழுக்கிறார் இளையராஜா.

எளிமையான பாடல் வரிகளில் உணர்வுகளை சுண்டி இழுக்கும் மேஜிக் இளையராஜாவின் இசைக்கு உண்டு. கூடவே அவரது அந்த கரகரப்பான குரலும் சேர்ந்து மனதை வருடிச் செல்கிறது. காட்டுக் கத்தலாக வரும் பாடல்களுக்கு மத்தியில் இந்த பாடலை தினம் தினம் கேட்க நாம் நிச்சயம் மறக்க மாட்டோம்.

பாடலைக் கேட்கக் கேட்க கிறுக்குப் பிடிப்பது போல இருக்கிறது… அப்படி ஒரு வசீகர மயக்க மருந்து தான் இந்த ”தினம் தினமும் உன் நெனப்பு” பாடல்.

கேட்டுப் பாருங்க… நீங்களும் அந்த பாடலில் மயங்கி சொக்கிப் போவீங்க…!