வல்லதேசம் – விமர்சனம்

ராணுவ அதிகாரியாக இருக்கும் நாசரிடம் ஒரு கமாண்டோ படை இருக்கிறது. இது அனுஹாசன் தலைமையில் இயங்கி வருகிறது. அனு ஹாசன் ஒரு ஆணுக்கு நிகராக செயல்பட்டு வருகிறார். இந்நிலையில், 16 தீவிரவாதிகள் அதிநவீன துப்பாக்கியுடன் இருப்பதாக போலீசுக்கு தகவல் வருகிறது. போலீஸ் சமாளிக்க முடியாததால், அனுஹாசன் தலைமையிலான கமாண்டோ படை அவர்களை தாக்கி வெற்றி பெறுகிறார்கள்.

இந்த தீவிரவாதிகள் மூலம், இந்தியாவின் முக்கிய இடங்களில் வெடிகுண்டு வைத்து தகர்க்க இருப்பதாகவும் தகவல்கள் கிடைக்கிறது. இது லண்டனில் இருக்கும் டேவிட் தலைமையில் இயங்குவதும் தெரியவருகிறது. இதை ரகசியமாக விசாரிக்க முடிவு செய்கிறார்கள். அதன்படி அனுஹாசனை சஸ்பெண்ட் செய்வதுபோல் நாடகமாடி, குடும்பத்துடன் லண்டனில் குடியேறுகிறார் அனுஹாசன்.

தீவிரவாதிகள் அனுஹாசனின் கணவர்தான் ரகசிய உளவாளி என்று கருதி அவரை கொலை செய்து விடுகிறார்கள். இந்த தாக்குதலில் தப்பிக்கும் அனுஹாசன் இறுதியில், தனி நபராக இருந்து, இந்தியாவை அழிக்க இருக்கும் டேவிட்டின் திட்டத்தை முறியடித்தாரா? இல்லையா? என்பதே படத்தின் மீதிக்கதை.

கதாநாயகிக்கு முக்கியத்துவம் உள்ள கதாபாத்திரத்தை ஏற்று துணிச்சலுடன் நடித்திருக்கிறார் அனுஹாசன். படம் முழுக்க விஜயசாந்தி போல் நடித்திருக்கிறார். ஆனால், காட்சிகள் வலுவாக இல்லாததால் இவரின் நடிப்பு பெரியதாக எடுபடவில்லை. நிறைய காட்சிகள் மனதில் ஒட்டாதது வருத்தம். லண்டனில் பல காட்சிகள் படமாக்கி இருக்கிறார்கள். லண்டன் லொகேஷன்கள் சிறப்பாக இருக்கிறது.

படத்தில் ராணுவ கேப்டனாக நடித்திருக்கிறார் நாசர். அவருக்கே உரிய அனுபவ நடிப்பில் ரசிகர்களை கவர்ந்திருக்கிறார். வில்லனாக நடித்திருக்கும் டேவிட் யுவராஜன், மிகப்பெரிய வசதிப்படைத்த சர்வதேச வில்லனாக நடித்திருக்கிறார். புதிய முகம் என்று இல்லாமல், மனதில் நிற்கும் படி நடித்திருக்கிறார்.

இராணுவத்தில் இந்தியாவிற்காக போராடுபவர்கள் ஆண்கள் மட்டுமில்லாமல், பெண்களும் போராடும் குணம் உள்ளவர்கள் இருக்கிறார்கள் என்று உனர்த்தும் விதமாக இயக்கி இருக்கிறார் இயக்குனர் நந்தா. ஆனால், திரைக்கதையில் சுவாரஸ்யம் இல்லாததால் ஒரு சில இடங்களில் தொய்வை ஏற்படுத்தி இருக்கிறது. இவரே இப்படத்திற்கு ஒளிப்பதிவு செய்திருக்கிறார். இவரின் ஒளிப்பதிவில் லண்டனின் அழகை மட்டும் ரசிக்க முடிகிறது. முத்துக்குமார சாமியின் இசையில் பாடல்கள் அனைத்தும் சுமார் ரகம். பின்னணி இசையில் கூடுதல் கவனம் செலுத்தி இருக்கலாம்.

மொத்தத்தில் ‘வல்லதேசம்’ வலு குறைவு.