’லெஜண்ட்’ சரவணனின் ‘தி லெஜண்ட்’ திரைப்படம் ஓடிடியில் ரிலீஸ்!

’சரவணா ஸ்டோர்’ உரிமையாளர் என பிரபலமாக அறியப்பட்ட தொழிலதிபரும், நாயக நடிகருமான ’லெஜண்ட்’ சரவணனின் ‘தி லெஜண்ட்’ திரைப்படம் டிஸ்னி+ ஹாட்ஸ்டார் ஓடிடி தளத்தில் இன்று (மார்ச் 3) பகல் 12.30 மணி முதல் உலகமெங்கும் தமிழ், தெலுங்கு, மலையாளம், இந்தி ஆகிய மொழிகளில் வெளியாகியுள்ளது.

தனது நிறுவனத்தின் விளம்பரப் படங்களில் நடித்து வெகுமக்களின் ஏகோபித்த வரவேற்பைப் பெற்ற ‘லெஜண்ட்’ சரவணன், இந்த வரவேற்பு கொடுத்த ஊக்கத்தால் அவரே தயாரித்து நடித்த ‘தி லெஜண்ட்’ திரைப்படத்தின் மூலம் வெள்ளித்திரையில் ஹீரோ ஆனார்.

அவர் நடிப்பில் உருவான ‘தி லெஜண்ட்’ திரைப்படம் சுமார் 600 திரை அரங்குகளில் கடந்த ஆண்டு ஜூலை மாதம் வெளியாகி பரவலாக பாராட்டைப் பெற்றது. இந்தப் படத்தை ஜே.டி – ஜெர்ரி இயக்கி இருந்தனர். லெஜண்ட் சரவணன், கீதிகா திவாரி, ஊர்வசி ரவுடேலா, விவேக், சுமன், நாசர், பிரபு, விஜயகுமார், லதா, தம்பி ராமையா உள்ளிட்டோர் இதில் நடித்திருந்தனர். ஹாரிஸ் ஜெயராஜ் இசை அமைத்திருந்தார்.

இந்த படம் வெளியான பிறகு லெஜண்ட் சரவணனை நேரில் சந்திக்கும் பலரும், சமூக ஊடகங்கள் மூலம் அவரை தொடர்பு கொள்வோரும் “தி லெஜண்ட்’ திரைப்படத்தின் ஓடிடி ரிலீஸ் எப்போது?” என்று மிகவும் ஆவலுடன் கேட்டு வந்தார்கள்.

இவ்வாறு கேட்டுக்கொண்டிருந்தவர்களுக்காக இதோ ஒரு மகிழ்ச்சியான செய்தி. ‘தி லெஜண்ட்’ திரைப்படம் ஹாட்ஸ்டார் தளத்தில் இன்று (மார்ச் 3, வெள்ளிக்கிழமை) பகல் 12.30 மணி முதல் உலகமெங்கும் தமிழ், தெலுங்கு, மலையாளம் மற்றும் இந்தி ஆகிய மொழிகளில் வெளியாகியுள்ளது. இதை ‘லெஜண்ட்’ சரவணன் அதிகாரபூர்வமாக அறிவித்துள்ளார்.

’தி லெஜண்ட்’ படத்தை வெள்ளித்திரையில் பார்க்கத் தவறிய ரசிகர்கள் இப்போது ஓ.டி.டி.யில் கண்டு களிக்கலாம்!