கர்நாடகாவின் அடுத்த முதல்வர் சித்தராமையா, துணை முதல்வர் டிகே சிவகுமார்: அதிகாரபூர்வ அறிவிப்பு

கர்நாடகாவின் அடுத்த முதல்வராக சித்தராமையாவும், துணை முதல்வராக டிகே சிவகுமாரும் பதவி ஏற்பார்கள் என்றும், டிகே சிவகுமார் மாநில காங்கிரஸ் தலைவராக தொடர்வார் என்றும் காங்கிரஸ் கட்சி இன்று (வியாழக்கிழமை) அதிகாரபூர்வமாக அறிவித்துள்ளது.

மே 10-ம் தேதி நடந்த சட்டப்பேரவைத் தேர்தலில் காங்கிரஸ் கட்சி தனிப்பெரும்பான்மையுடன் வெற்றி பெற்றது. இருந்த போதிலும் முன்னாள் முதல்வர் சித்தராமையாவுக்கும், மாநில காங்கிரஸ் தலைவர் டிகே சிவகுமாருக்கும் இடையில் முதல்வர் பதவி குறித்த போட்டி வெளிப்படையாக நிலவியதால் அடுத்த முதல்வரைத் தேர்வு செய்வதில் இழுபறி நீடித்தது.

கடந்த ஞாயிற்றுக்கிழமை பெங்களூருவில் நடந்த கட்சி எம்எல்ஏக்கள் கூட்டத்தில், முதல்வரைத் தேர்ந்தெடுக்கும் பொறுப்பு கட்சியின் தேசிய தலைவர் மல்லிகார்ஜுன கார்கேவிடம் ஒப்படைத்து ஒற்றைத் தீர்மானம் நிறைவேற்றப்பட்டது. அதனைத் தொடர்ந்து மூன்று நாட்கள் நீடித்த பல கட்ட பேச்சுவார்த்தைகளுக்கு பிறகு இன்று (வியாழக்கிழமை) முடிவு எட்டப்பட்டுள்ளது.

இது குறித்து காங்கிரஸ் பொதுச்செயலாளர் கே.சி வேணுகோபால் கூறுகையில், “சித்தராமையா கர்நாடகாவின் முதல்வராக நியமிக்கப்பட்டுள்ளார். டிகே சிவக்குமார் ஒரே துணை முதல்வராக இருப்பார், மேலும், மக்களவைத் தேர்தல் முடியும் வரை சிவகுமார் கர்நாடகா மாநில காங்கிரஸ் தலைவராக தொடர்வார். முதல்வர், துணை முதல்வர் மற்றும் அமைச்சர்கள் மே 20-ம் தேதி (சனிக்கிழமை) பதவி ஏற்றுக்கொள்வார்கள். ஒரே கருத்துள்ள கட்சிகளை இந்தப் பதவி ஏற்பு விழாவில் கலந்துகொள்ள அழைப்பு விடுக்கிறோம்” என்று தெரிவித்தார்.

காங்கிரஸ் கட்சியின் இந்த அறிவிப்பால், கர்நாடகாவின் அடுத்த முதல்வர் யார் என்பது குறித்து கடந்த 5 நாட்கள் நீடித்த இழுபறிக்கு முடிவு ஏற்பட்டுள்ளது.