முழு படத்தையும் ‘கிம்பல்’ தொழில் நுட்பத்தில் படம் பிடித்த ‘பரியேறும் பெருமாள்’ ஒளிப்பதிவாளர்!

இயக்குநர் பா.இரஞ்சித் தயாரிப்பில் மாரி செல்வராஜ் இயக்கத்தில் கதிர், கயல் ஆனந்தி, யோகிபாபு, லிஜிஸ் நடித்துள்ள படம் ‘பரியேறும் பெருமாள்’. சந்தோஷ் நாராயணன் இசையமைத்திருக்கும் இப்படம், மிகுந்த எதிர்பார்ப்புகளுக்கு மத்தியில் வருகிற (செப்டம்பர்) 28 அன்று திரைக்கு வருகிறது.

இந்த படம் முழுவதையும் ‘கிம்பல்’ தொழில்நுட்பத்தில் படமாக்கியிருக்கிறார்கள். அந்த அனுபவம் குறித்து இப்படத்தின் ஒளிப்பதிவாளர் ஸ்ரீதர் கூறுகையில்,

“பரியேறும் பெருமாள்’ என்னுடைய இரண்டாவது படம். முதல் படம் ‘மாலை நேரத்து மயக்கம்’.

நான் பிறந்து வளர்ந்தது சென்னை தான். எனக்கு அதிகமாக கிராமத்து வாழ்க்கை பற்றி பரிச்சயம் இல்லை. எனது முதல் படமும் நகரத்து கதை சார்ந்த படம் தான்.

ஒளிப்பதிவாளர் ராம்ஜி சார் தான் எனது குரு. அவரிடமிருந்து கற்றுக்கொண்ட விசயங்கள் தான் என்னை புதிதாக இயங்கச் சொல்கிறது.

எனக்கு சில எழுத்தாளர்கள் நண்பர்களாக இருக்கிறார்கள். வாசிப்பு அனுபவமும் கொஞ்சம் உண்டு. அந்த வகையில் என்னோடு அறிமுகமானவர் தான் இயக்குனர் மாரி செல்வராஜ். .

‘பரியேறும் பெருமாள்’ கதையைக் கேட்டவுடன்  இந்த கதைக்கு நாம் வழக்கமான ஒளிப்பதிவு செய்யாமல் கொஞ்சம் மெனக்கிட வேண்டும் என்கிற எண்ணம் வந்தது.

படப்பிடிப்பு முழுக்க முழுக்க திருநெல்வேலி மாவட்டத்துப் பகுதிகளில். அந்த ஊர்களின் பசுமை, வறட்சி, தெருக்கள், வெயில் மனிதர்கள், விலங்கினங்கள் அனைத்தையும் அப்படியே படம் பிடிக்க வேண்டும், கூடவே ஒரு அழகியலும் இருக்க வேண்டும் என்கிற ஆசை. கதைக்களம்,  அதன் வேகம் இதற்கு ஈடு கொடுக்க ‘கிம்பல்’ எனும் தொழில் நுட்பத்தை முழுக்க முழுக்க படத்தில் பயன்படுத்தியிருக்கிறேன்.

40 கிலோ எடை கொண்ட கிம்பல் கேமரா உபகரணங்களை தோளில் சுமந்துகொண்டு முழுப் படத்தையும் எடுப்பது சிரமமாக இருந்தாலும், படம் பார்க்கும்பொழுது  மகிழ்ச்சியாக இருந்தது.   பட்ட சிரமத்திற்கு பலன் கிடைத்திருக்கிறது.   கிராமத்து நிலமும், மக்களும், வாழ்வியலும் தினம் தினம் என்னை உற்சாகமூட்டியதும், தயாரிப்பாளர் பா.இரஞ்சித் அண்ணனின் ஒத்துழைப்பும், இயக்குனர்  மாரி செல்வராஜ்  ஒத்துழைப்பும் சவாலான வேலையை செய்து முடிக்க பெரும் உதவியாக இருந்தது.

எந்த இடத்திலும்  அந்த நிலத்தின் கலர் மாறாமல் அதை அப்படியே கொண்டுவர முயற்சி செய்திருக்கிறோம். மனிதர்களோடு விலங்குகளும் இந்த படத்தில் நடித்திருக்கின்றன. அவற்றை படம் பிடிக்க கிம்பல் போன்ற உபகரணம் பெரிதும் உதவியது.

குடும்பத்தோடு பார்க்கக்கூடிய அழகான ஒரு படமாக இது வந்திருக்கிறது. திருநெல்வேலியின் நிஜ வெளிச்சத்தையும், அழகையும்  இந்த படத்தில் பெரிதும் எதிர்பார்க்கலாம்” என்றார்  உற்சாகமாக.