மணிரத்னம் இயக்கத்தில் கமல்ஹாசன் வேல் நாயக்கராக நடிக்கும் புதிய படம் ‘தக் லைஃப்’

கமல்ஹாசன் நடிப்பில், மணிரத்னம் இயக்கும் புதிய படத்தின் தலைப்பு அதிகாரபூர்வமாக அறிவிக்கப்பட்டுள்ளது. ராஜ்கமல் நிறுவனம் தயாரிக்கும் இப்படத்துக்கு ‘தக் லைஃப்’ (Thug Life) என பெயரிடப்பட்டுள்ளது. இதன் படப்பிடிப்பு அடுத்த ஆண்டு தொடங்க இருக்கிறது.

ஷங்கர் இயக்கும் ‘இந்தியன் 2’ படத்தை கமல்ஹாசன் முடித்துவிட்டார். அடுத்து பிரபாஸின் ‘கல்கி 2829 ஏ.டி’, அதற்கடுத்து ஹெச்.வினோத் இயக்கும் படம், அதன்பின் மணிரத்னம் இயக்கும் படம் ஆகியவற்றில் அவர் நடிக்க இருக்கிறார்.

ஹெச்.வினோத் இயக்கும் படத்தின் அறிமுகத் தோற்றம் கமல்ஹாசன் பிறந்தநாளான நாளை (நவம்பர் 7) வெளியாகிறது.

இதனிடையே, கமல்ஹாசன் – மணிரத்னம் 35 ஆண்டுகளுக்குப் பிறகு மீண்டும் இணையும் ‘KH234’ படத்தின் இண்ட்ரோ வீடியோ தற்போது வெளியாகியுள்ளது. இதற்கான படப்பிடிப்பு சமீபத்தில் சென்னையில் 2 நாட்கள் நடைபெற்ற நிலையில், படத்தின் தலைப்பு தற்போது அறிவிக்கப்பட்டுள்ளது.

‘தக் லைஃப்’ (Thug Life) எனப் பெயரிடப்பட்டுள்ள இந்த படத்தின் இண்ட்ரோ வீடியோவில், ”என் பேரு ரங்க ராயர் சக்திவேல் நாயக்கன்; காயல்பட்டினக்காரன்” என தனக்கே உரிய ஸ்டைலில் கமல் இன்ட்ரோ கொடுத்துள்ளார். வீடியோவில் கமலின் ஆக்‌ஷன் காட்சிகள் கவனம் ஈர்க்கின்றன. தற்போது இந்த வீடியோ வைரலாகி வருகிறது.

கமல்ஹாசன் – மணிரத்னம் கூட்டணியில் 35 ஆண்டுகளுக்கு முன்பு வெளிவந்த ‘நாயகன்’ படத்தில் கமல் கேரக்டரின் பெயர் சக்திவேல் நாயக்கர். அதை படத்தில் வரும் இதர கதாபாத்திரங்கள் சுருக்கி ‘வேல் நாயக்கர்’ என்று அழைப்பார்கள். ‘தக் லைஃப்’ படத்திலும் கமல்ஹாசன் பெயர் ‘சக்திவேல் நாயக்கர்’ என்பதால், இதிலும் சுருக்கி ‘வேல் நாயக்கர்’ என அழைக்கப்பட வாய்ப்பு இருக்கிறது.

’தக் லைஃப்’ படத்தில் நடிப்பவர்கள் விவரங்களை ராஜ்கமல் நிறுவனம் ஒவ்வொன்றாக அறிவித்துவந்தது. அதன்படி, நடிகர்கள் ஜெயம் ரவி, துல்கர் சல்மான், நடிகை த்ரிஷா ஆகியோர் முக்கிய கதாபாத்திரங்களில் இணைந்துள்ளதாக அறிவித்துள்ளது. இந்தப் படத்தை மெட்ராஸ் டாக்கீஸ், ராஜ்கமல் பிலிம்ஸ் இன்டர்நேஷனல், ரெட் ஜெயன்ட் இணைந்து தயாரிக்கின்றன. ஏ.ஆர்.ரஹ்மான் இசையமைக்கிறார். ரவி கே.சந்திரன் ஒளிப்பதிவு செய்கிறார். அடுத்த வருடம் இதன் படப்பிடிப்பு தொடங்க இருக்கிறது.