ஆயிரம் திரை யரங்குகளில் வெளியாகிறான் ‘அன்பானவன் அசராதவன் அடங்காதவன்’

குளோபல் இன்ஃபோடெயின்மென்ட் மைக்கேல் ராயப்பன் வழங்க, செராபின் ராய சேவியர் தயாரித்திருக்கும் திரைப்படம் ‘அன்பானவன் அசராதவன் அடங்காதவன்’.

சிம்பு, தமன்னா, ஸ்ரேயா மற்றும் பலர் நடித்துள்ள இப்படத்தை ஆதிக் ரவிச்சந்திரன் இயக்கியுள்ளார். ‘த்ரிஷா இல்லனா நயன்தாரா’ வெற்றிப்படத்திற்குப் பிறகு ஆதிக் ரவிச்சந்திரன் இயக்கியுள்ள இரண்டாவது படம் இது. யுவன்ஷங்கர் ராஜா இசையமைத்துள்ளார்.

இப்படத்தை இரண்டு பாகங்களாக தயாரித்துள்ளார்கள். முதல் பாகம் வருகிற 23ஆம் தேதி திரைக்கு வருகிறது. தமிழகத்தில் 450 திரையரங்குகள், கேரளாவில் 75 திரையரங்குகள், கர்நாடகாவில் 50 திரையரங்குகள், வட இந்தியாவில் 50 திரையரங்குகள், வெளிநாடுகளில் 300 திரையரங்குகள் என உலகம் முழுவதும் சுமார் 1000 திரையரங்குகளில் இப்படம் வெளியாகிறது.

சிம்பு இப்படத்தின் முதல் பாகத்தில் மதுர மைக்கேல், அஸ்வின் தாத்தா ஆகிய வித்தியாசமான இரண்டு கதாபாத்திரங்களில் நடித்துள்ளார். இக்கதாபாத்திரங்கள் டீசர் மூலமும், பாடல்கள் மூலமும் ஏற்கெனவே பிரபலப்படுத்தப்பட்டு, ரசிகர்களிடம் நல்ல வரவேற்பை பெற்றுள்ளன என்பது குறிப்பிடத்தக்கது.

“பொதுவாக அனைத்து திரைப்பட ரசிகர்களுக்கும், குறிப்பாக சிம்புவின் ரசிகர்களுக்கு இந்த படம் மிகவும் கொண்டாட்டமான படமாக நிச்சயம் இருக்கும்” என்கிறார் இதன் இயக்குனர் ஆதிக் ரவிச்சந்திரன்.

தணிக்கைக் குழு இப்படத்துக்கு யு/ஏ சான்றிதழ் வழங்கியிருக்கிறது.