”மேஜர் முகுந்த் வரதராஜன் ஒரு பிராமணர்” என்பதை மறைத்ததாக குற்றச்சாட்டு: ‘அமரன்’ இயக்குநர் விளக்கம்!

கமல்ஹாசனின் ராஜ்கமல் இண்டர்நேஷனல் தயாரித்து, ராஜ்குமார் பெரியசாமி இயக்கத்தில் சிவகார்த்திகேயன் நடித்துள்ள ‘அமரன்’ திரைப்படம் தீபாவளி ரிலீசாக வெளியாகி வசூல் ரீதியாகவும், திரை விமர்சன ரீதியாகவும் நல்ல வரவேற்பை பெற்று வருகிறது. 2014-ம் ஆண்டு காஷ்மீரில் தீவிரவாதிகளுடன் நடந்த மோதலில் தனது இன்னுயிரை நீத்த சென்னையைச் சேர்ந்த மேஜர் முகுந்த் வரதராஜனின் வாழ்க்கையில் நடந்த சம்பவங்களே இப்படத்தின் கதை என்பது அனைவருக்கும் தெரியும்.

திரைக்கதை, இசை, ஒளிப்பதிவு, நடிகர்களின் தேர்ந்த நடிப்பு என பாராட்டுவதற்கு ஏராளமான அம்சங்கள் இருந்தபோதிலும் அவற்றை எல்லாம் விட்டுவிட்டு, ”மேஜர் முகுந்த் வரதராஜன் ஒரு பிராமணர் என்கிற அடையாளத்தைக் காட்டாமல் வேண்டுமென்றே படக்குழு மறைத்துவிட்டது” என்று சில பிராமணப் பத்திரிகைகளும், சில பிராமணிச லாபியிஸ்டுகளும் குற்றம் சாட்டி வருகின்றனர். அவர்கள் கூறுவதாவது:-

“அமரன் படத்தின் இரண்டு பிரதான கதாபாத்திரங்களில் ஒன்றான சாய் பல்லவியின் கதாபாத்திரம், அதாவது மேஜர் முகுந்தின் மனைவி இந்து ரெபக்கா வர்கீஸ், படம் முழுக்க ஒரு கிறிஸ்தவப் பெண்ணாகவே காட்டப்படுகிறார். அதுதான் உண்மையும் கூட. படத்தில் வரும் இந்து ரெபக்கா வர்கீஸின் பெற்றோர் வீடாகட்டும், திருமணத்துக்குப் பிறகு அவர் இருக்கும் ஒரு அபார்ட்மென்ட்டின் சுவரில் தொங்கும் இயேசுவின் படமாகட்டும், இப்படி படம் முழுக்க இது மிகவும் தெளிவாக காட்டப்படுகிறது. அதில் குறை சொல்ல எதுவும் இல்லை.

ஆனால், இந்த விவரிப்புகள் மேஜர் முகுந்தாக நடித்த சிவகார்த்திகேயனின் கதாபாத்திரத்தில் ஏன் இல்லை? நிஜ வாழ்க்கையில் மேஜர் முகுந்த் ஒரு பிராமணக் குடும்பத்தை சேர்ந்தவர் என்பதை திரையிலும் காட்ட என்ன தயக்கம்? படத்தின் தயாரிப்பாளரும் அரசியல்வாதியுமான கமல்ஹாசனுக்கு ஒரு பிராமண சமூகத்தைச் சேர்ந்த ராணுவ வீரரை அவரது சொந்த அடையாளத்துடன் காண்பிப்பதில் ஏதேனும் பிரச்சினையா? அல்லது, படத்தை வெளியிட்ட ஆளும் கட்சிப் பின்னணியைக் கொண்ட ரெட் ஜெயண்ட் நிறுவனம் கொடுத்த அழுத்தமா?

படம் முழுக்க சிவகார்த்திகேயன் அவரது தந்தையை ‘நைனா’ என்று விளிப்பது, அவரது பிராமண அடையாளத்தை மறைப்பதற்காகவே திட்டமிட்டு திணிக்கப்பட்டதாகவே தோன்றுகிறது.

சாய் பல்லவியின் கதாபாத்திரம் கிட்டத்தட்ட படத்தில் பல காட்சிகளில் கழுத்தில் சிலுவை அணிந்த, கடவுளுக்கு அஞ்சும் பெண்ணாக காட்டப்படும் அதே நேரத்தில் சிவகார்த்திகேயன் கதாபாத்திரத்தின் பிராமண அடையாளம் திட்டமிட்டு மறைக்கப்பட்டுள்ளதாகவே இதனை பார்க்க முடிகிறது. இப்படி இருக்கும்போது இப்படத்தை எவ்வாறு உண்மையை அடிப்படையாகக் கொண்ட ஒரு பயோபிக் என்று கூற இயலும்?

ராணுவமோ, கடற்படையோ, விமானப் படையோ அதில் பணியாற்றும் வீரர்களை சாதி, மத அடையாளங்களுக்குள் அடைக்கக் கூடாது. அவர்கள் செய்யும் சேவை காரணமாகவே அவர்கள் கொண்டாடப்பட வேண்டும். அதே நேரம் நாட்டுக்காக வீர மரணம் அடைந்த ஒரு ராணுவ வீரரின் கதையை திரைப்படமாக எடுக்கும்போது, அதில் அவரைப் பற்றிய உண்மைத் தகவல்கள் திரிபுகள் இன்றி இடம்பெறுதல் அவசியம்.

இதே கதையில் மேஜர் முகுந்த் வரதராஜனை வேறு மாநிலத்தைச் சேர்ந்தவர் என்று மாற்றிக் கூறினால், அது எவ்வளவு அபத்தமாகுமோ அப்படித்தான் அவரது சொந்த (பிராமண) அடையாளத்தை மறைப்பதும். அப்படி மறைத்தால் அது பயோபிக் படமல்ல. மேலும், ‘அமரன்’ படத்தில் இடம்பெற்றுள்ள மற்ற விவரிப்புகள் அனைத்தும் துல்லியமாக இருக்கையில், இது மட்டும் பாரபட்சத்துடன் திட்டமிட்டு மறைக்கப்படுவதில் இருக்கும் உள்நோக்கம் என்ன? இதுவும் தொடர்ந்து திராவிட ஆதரவாளர்களால் வெளிப்படுத்தப்படும் பிரமாணர்கள் மீதான வெறுப்பின் நீட்சியோ என்று எண்ணத் தோன்றுகிறது.

இதற்கு எதிர்வினையாற்ற வேண்டியே மேஜர் முகுந்த் போன்ற வீரர்களின் உண்மையான அடையாளம் வெளிப்படுத்தப்பட வேண்டியது அவசியமாகிறது. ஒரு பிராமண சமூகத்தைச் சேர்ந்தவரை ராணுவ வீரனாகவோ, கதாநாயகனாகவோ காட்டுவதற்கு தமிழ் சினிமாவில் எழுதப்படாத தடை இருப்பது தெரிந்த விஷயம்தான். அதற்கு ‘அமரன்’ படமும் விதிவிலக்கல்ல.

இவ்வாறு அவர்கள் குற்றம் சாட்டி வருகின்றனர்.

இந்நிலையில், ‘அமரன்’ திரைப்படத்தின் வெற்றிக் கொண்டாட்டம் நேற்று (நவம்பர் 04) சென்னை லீலா பேலஸில் நடைபெற்றது. இந்நிகழ்வில் இப்படத்தின் இயக்குநர் ராஜ்குமார் பெரியசாமி பேசுகையில், பிராமண மத்திரிகைகள் மற்றும் பிராமண லாபிஸ்ட்டுகளின் குற்றச்சாட்டுக்கு விளக்கம் அளித்தார். அவர் கூறியதாவது:

இந்த படம் சம்பந்தமான சில சர்ச்சைகளுக்கு நான் முற்றுப்புள்ளி வைக்க விரும்புகிறேன். ஒரு ’தமிழர் அடையாளம்’ இந்த படத்துக்கு இருக்க வேண்டும் என்பது மேஜர் முகுந்த் வரதராஜனின் மனைவி இந்து ரெபக்கா வர்கீஸ் எங்களிடம் வைத்த கோரிக்கை. இத்தனைக்கும் இந்து ரெபேக்கா வர்கீஸ் கேரளாவைச் சேர்ந்த மலையாளி. மேலும், முகுந்தாக நடிப்பவர் தமிழ் ரூட்ஸ் உள்ள நடிகராக இருக்க வேண்டும் என்றும் அவர் கேட்டுக்கொண்டார். அதனால் தான் முகுந்தாக நடிக்க சுத்தத் தமிழனான சிவகார்த்திகேயனை தேர்ந்தெடுத்தோம்.

அதேபோல முகுந்த் ‘நைனா’ ’நைனா’ என்று ஆசையாக அழைக்கும் அந்த தந்தை வரதராஜனும், ‘ஸ்வீட்டி’ என்று செல்லமாக அழைக்கும் தாய் கீதாவும் வைத்த கோரிக்கை, ”முகுந்த் எப்போதும் தன்னை இந்தியன் என்று சொல்லிக்கொள்ளவே ஆசைப்படுவார். தன்னுடைய சான்றிதழில் கூட எந்த குறியீடும் இருக்கக் கூடாது என்று நினைப்பார். எனவே ஒரு இந்தியன், தமிழன் என்ற அடையாளத்தை மட்டும் ஒரு ராணுவ வீரனாக இந்த படத்தில் அவருக்கு கொடுங்கள்” என்றனர். இவற்றை எல்லாம் அந்த குடும்பத்தார் எங்கள் முதல் சந்திப்பிலேயே கேட்டுக்கொண்டனர். 

அதே நேரம் ஒரு இயக்குநராக, இந்த பயணத்தில் முகுந்த் எந்த சமூகத்தைச் சேர்ந்தவர் என்பது ஒரு முக்கியமான விஷயமாக எங்களுக்குப் படவில்லை. அவர்கள் வீட்டுக்கு நாங்கள் சென்றபோது கூட நாங்களும் அதை கேட்கவில்லை. அவர்களும் அதை சொல்லவில்லை.

இவ்வாறு ராஜ்குமார் பெரியசாமி தெரிவித்தார்.