”இந்தியைத்தான் ஆங்கிலத்துக்கு மாற்றாக கருத வேண்டும்; உள்ளூர் மொழிகளை அல்ல”: அமித்ஷா சர்ச்சை பேச்சு!

டெல்லியில் நடைபெற்ற நாடாளுமன்ற அலுவல் மொழிக் குழுவின் 37-வது கூட்டத்தில் ஒன்றிய உள்துறை அமைச்சர் அமித் ஷா உரையாற்றினார். அப்போது அவர் கூறியதாவது:-

 நாட்டின் ஒருமைப்பாட்டின் முக்கிய அங்கமாக, இந்தியை அலுவல் மொழியாக மாற்ற வேண்டிய நேரம் வந்துவிட்டது. இந்தியாவின் மொழியான இந்தியை வெவ்வேறு மாநிலங்களில் உள்ள குடிமக்கள் ஒருவருக்கொருவர்  தொடர்புகொள்ள பயன்படுத்த வேண்டும்.

இந்தியைத்தான் ஆங்கிலத்துக்கு மாற்றாகக் கருத வேண்டும். உள்ளூர் மொழிகளை அல்ல.

இந்தியாவில் தேசிய மொழி இல்லை என்றாலும், இந்திதான் நாட்டின் அதிகாரபூர்வ மொழியாகும். ஆட்சியை நடத்த இந்திதான் தொடர்பு மொழியாக இருக்க வேண்டும் என்று பிரதமர் நரேந்திர மோடி முடிவு செய்துள்ளார். இது மொழியின் முக்கியத்துவத்தை மேலும் அதிகரிக்கும்.

அமைச்சரவையின் 70 சதவிகித நிகழ்ச்சி நிரல்கள் இனி இந்தியில் தான் தயாராகும். வடகிழக்கின் 8 மாநிலங்களிலும் 10ஆம் வகுப்பு வரை இந்தி வரும் நாட்களில் கட்டாயமாக்கப்படும். மாணவர்கள் இந்தி மொழித் தேர்வுகளில் அதிக கவனம் செலுத்த வேண்டும்.

இவ்வாறு அமித்ஷா பேசினார்.

அமித் ஷாவின் இந்த சர்ச்சைக்குரிய பேச்சுக்கு சமூக வலைதளங்களில் கடும் கண்டனங்கள் அதிகரித்து வருகின்றன.