அமீர் – வெற்றிமாறன் கூட்டணியில் உருவாகிறது “இறைவன் மிகப் பெரியவன்’
‘மௌனம் பேசியதே’, ‘ராம்’, ‘பருத்திவீரன்’, ‘ஆதிபகவன்’ போன்ற படங்களை இயக்கி, தமிழ்த் திரையுலகின் முன்னணி இயக்குனர்களின் ஒருவராகத் திகழ்பவர் அமீர். இவர் ’யோகி’ என்ற படத்தில் கதாநாயகனாக நடித்து, நடிகராக அறிமுகமானவர். வெற்றிமாறன் இயக்கிய ’வடசென்னை’ படத்தில் முக்கிய கதாபாத்திரத்தில் நடித்து விமர்சகர்கள் மற்றும் ரசிகர்களின் பாராட்டுக்களைப் பெற்றவர்.
அமீர் தற்போது மீண்டும் ஒரு புதுப்படத்தை இயக்கவுள்ளார். இந்த படத்தின் கதையை பிரபல இயக்குனர் வெற்றிமாறன் மற்றும் தங்கம் ஆகிய இருவரும் எழுதியுள்ளனர். யுவன் சங்கர் ராஜா இசையமைக்கிறார். இப்படத்துக்கு ‘இறைவன் மிகப் பெரியவன்’ என பெயர் சூட்டப்பட்டிருக்கிறது. ‘அல்லா ஹூ அக்பர்’ என்ற அரேபிய வாக்கியத்தின் தமிழாக்கம் தான் ‘இறைவன் மிகப் பெரியவன்” என்பது குறிப்பிடத்தக்கது.
‘இறைவன் மிகப் பெரியவன்’ படத்தின் டைட்டில் போஸ்டரை படக்குழு இன்று (14-02-2022) வெளியிட்டுள்ளது. அதில் முஸ்லிம், இந்து, கிறிஸ்துவம் ஆகிய மூன்று மதங்களின் அடையாளங்கள் இடம் பெற்றிருப்பது அனைவரின் கவனத்தை ஈர்த்துள்ளது.
