“2 விதமான 500 ரூபாய் நோட்டுகளை மோடி அரசு வெளியிட்டது மிகப் பெரிய ஊழல்!”

எதிர்க்கட்சித் தலைவர் குலாம் நபி ஆசாத் (காங்கிரஸ்) பேசும்போது, “இது நாட்டின் மிகப் பெரிய ஊழல். எனவே, 5 நிமிடம்கூட ஆட்சியில் தொடர இந்த அரசுக்கு உரிமை இல்லை” என்றார்.

இதனிடையே, மத்திய நிதியமைச்சர் அருண் ஜேட்லி பேசும்போது, “பூஜ்ஜிய நேரத்தில் எவ்வித நோட்டீஸும் வழங்காமல் அற்பமான பிரச்சினைகளை எழுப்புகிறீர்கள். பதிலை பெற வேண்டும் என்ற நோக்கமின்றி அமளியை ஏற்படுத்தும் நோக்கத்தில் பிரச்சனை எழுப்புகிறீர்கள். அவை விதி முறைப்படி எந்த ஒரு தாளையும் இங்கு காட்டக் கூடாது. ரூபாய் நோட்டு பற்றி பொறுப்பற்ற தகவலை கூறுகிறார்கள். பூஜ்ஜிய நேரம் தவறாக பயன்படுத்தப்படுகிறது” என்றார்.

இதையடுத்து, டெரிக் ஓ பிரயன் ( திரிணமூல் காங்கிரஸ்), சரத் யாதவ் (ஐக்கிய ஜனதா தளம்), நரேஷ் அகர்வால் (சமாஜ்வாதி) உள்ளிட்ட எதிர்க்கட்சி உறுப்பினர்கள் அனைவரும் இந்தப் பிரச்சினையை எழுப்பினர். பின்னர் அவையின் மையப்பகுதிக்குச் சென்று அரசுக்கு எதிராக கோஷம் எழுப்பினர். இதனால் அமளி நிலவியதால் அவை ஒத்தி வைக்கப்பட்டது.

பின்னர் அவை கூடியபோதும் இதே நிலை நீடித்தது. இதனால் பலமுறை ஒத்திவைக்கப்பட்ட அவை பின்னர் நாள் முழுவதும் ஒத்திவைக்கப்பட்டது.